Ad instruendam plenius posterorum noticiam, refellendamque calumpniatorum versutiam, congruum duximus acta diebus nostris ut litteris tradamus. Domnus Hugo de Bitiaco, qui illius temporis curriculo cellarii camereque Cluniacensis curam gerebat, jussu domni abbatis, commercium quoddam ad augmentum jam dicti loci fecit cum quodam milite, id est Joceranno de Coperia. Est siquidem quędam villa in pago Maticensi, Casales dicta, ubi isdem miles pociorem habebat partem, ibi in aquam Graone molendini fuere constructi, sedesque sunt vacuę, his officinis aptę. Prelibatus nempe miles et prefatus frater Hugo, composita stabilitaque inter se coram testibus ratione ut ad certitudinem venerunt, dedit senior sepedictus domnus Hugo jam fato Joceranno CL solidos quos ob raritatem fortes vocant, et ipse Jocerannus ob hoc misit ipsi reliquisque senioribus loci Sancti Petri Cluniacensis in pignore duos molendinos quos in supra nominata sua villa habebat, eo tenore ut quandiu hanc pecuniam penes se tenuerit, fratres Cluniacenses hæc molendina commodaque ex his procedentia habeant, et si in ipsa possessione locis aptis alia construxerint molendina, similiter in suo jure habeant. Quod si sepedictus Jocerannus, vigens et valens, redimere hoc pignus voluerit, aut suprascripte monete quantitatem reddat, aut Silviniacenses solidum per XVII, vel Cabilonenses per XVIII, monetę probatę tunc currentes. Si vero ipse vel uxor sua inter hæc obierint, utraque molendina loco Sancti Petri sint subjecta. Quique primus discesserit, unum ex his molendinum Beato remaneat Petro. Si utrique ante redemptionem finierint, utraque sint apostolo Petro. Testes et auditores rationis hujus sunt: Humbertus [de] Bresses, Letbaldus [de] Digonia, Letbaldus [de] Jhoperia, Stephanus nepos Lodteni. Jocerannus Plena Fide et Odila uxor ejus laudaverunt.